Kan mo ti ena si-zan, enn zour
mo ti trouv enn zoli-zoli zimaz dan enn liv. Liv
la ti lor Lafore Vierz e li ti apel "Bann Zistoir Vre".
Zimaz la ti montre enn serpan boa ki ti pe aval
enn zanimo feros.
Dan liv la ti dir ki bann boa zot aval zot manze
antie, san kraze, san mase. Lerla zot nepli
kapav bouze. Zot dormi pandan sis moi pou dizer
zot manze.
Sa zistoir la ti bien travay mo latet e li ti donn moi lide pou mo fer mo
premie desin. Mo montre mo desin bann gran dimoun; mo dimann zot si zot pa
gagn per. Zot dir moi sapo pa fer dimoun per.
Ayo! Pa sapo ki mo ti desine me enn boa ki ti pe dizer enn lelefan. Lerla
pou ed gran dimoun konpran mo ti bizin desinn enn lelefan dan vant enn boa.
Pa fasil ar zot.
Bann gran dimoun lerla konsey moi pa perdi letan ar desin boa avek lelefan
vizib ousa invizib dan so vant me okip sirtou zeografi, istoir, arismetik
ek gramer. Akoz samem, ler mo ti ena si-zan mo ti abandonn posibilite vinn
enn gran pint. Mo de premie desin ti fel dapre bann gran dimoun. Sa zot pa
konpran nanye e nou zanfan nou fatige nek explik zot tou zafer.
Mo ti oblize soizir enn lot metie: aprann pilot avion. Dan avion mo finn
al boukou landroi dan lemonn. Bizin aksepte zeografi ti finn bien ed moi.
Enn sel kout gete mo ti kapav kone sipa mo avion ti lor Lasinn ousa Arizona.
Sa mari serye kan ou finn perdi sime dan fernoir.
Koumsamem, dan mo lavi mo finn zoinn enn ta dimoun serye. Mo finn pas boukou
letan ar bann gran dimoun. Mo ankor koir pa fasil ar zot.
Parfoi kan mo ti koir ki mo ti finn zoinn enn gran dimoun inpe korek, mo
ti montre li mo premie desin ki mo gard toultan ar moi. Enn ti tes! Me toultan
mo ti pe gagn mem repons: "Enn sapo sa!" Kan sa ti arive, mo ti refiz koz lor
serpan boa, lafore vierz, ousa zetoil. Mo ti rant dan so zoue. Mo ti koz zoue
kart, golf, politik ek kravat. E gran dimoun la ti satisfe parski li ti zoinn
enn zennom rezonab.
